2 YONI Yoni 'ina lele heluwena
Yoni 'ina leta bewa 'alona 'ihe'ote'otetela helau ma he'ita dumwaluna weyahidi.2 John
Loyauwedo
1Taugu 'imi bada, ma 'owa wahine Yehoba 'ihesinuwegowa manatumwao 'imi leta bewa yaleleyawa. Moisa tuwa 'ateguwega yahelauwegomi. Taudi wete gide 'eda moisa 'ana tomuliyao sihelauwegomiya, 2weyahina sanapu moisa 'ateda 'imiyamiya ma 'oida 'imiyahataya. 3Coinega Tamada Yehoba ma Natuna Yesu Keliso 'idi helau ma 'idi 'atemuyamuya 'oidiyega nata tamiya daumwala, ma'ida gwae moisa, eema wete ma'ida helau.Keliso 'ote'otetelina wa'abiyahi
4Mwalo natumwao tupwadi ya'itediya 'eda dumwadumwaluna simuliyeya, gide 'ada loina Tamada 'oinega, 'oinega yayaliyaya madouna.5Nuhugu yo, yahegwaego wete bewa geya 'abehega loina hauhauna ya'ebwaego, ma hesi loina miyamiyanaina wahesagohe nugeteya, 'abehega mabwaiyada tahelau hilegita. 6Weyahina 'eguma tahelau hilegita, beno Yehoba 'ina loinao tamulimuliyedi, ma loinaina mwalo wahesagoheya 'abehega helau 'ana 'eda 'oinega tatauya.
7Ma to'abowao baibaiwadi sihapwesa pwaiya bale'uwa ma siuhauhala sigwae, “Yesu Keliso geya 'iheloheya.” Ceguma taiya gide 'i'abo 'esa, tauna Keliso 'ana 'aleha. 8Coinega to'abowedi 'oidiyega wa'itayahigomi, ma 'imi paihowa 'ana maisa geya'abwa wauleule, ma hesi mabwaiyana wa'ewa. 9Ma 'eguma watauya pui ma Keliso 'ina he'ita wa'ebesine, 'omi Yehoba wa'ebe'ebesine, ma hesi 'eguma Keliso 'ina he'itao wa'abiyahi momosidi, Tamadai ma wete Natuna 'oimiya simiyamiya.
10Ceguma taiya 'oimiya 'inaowa ma 'ina he'ita hagana, geya'abwa wabwaubwauwe 'imi hada, ma geya'abwa waloloyauwedowe, 11nata gide 'ina paihowa galana waleme.
Gwae 'ana 'ebe losaloha
12Nuwatuhu baibaiwana simiyamiya eema nuwanuwagu weyahidi yaleleyawa, ma tuwa, weyahina yanuwatuhu yahiya 'abehega 'abwa yatauyawa 'omi mahetegwao tahegwaegwae, eema tayaliyaya moisa.13Tasiu tauna wete hesihesinuwana Yehoba 'oinega, tauna natunao 'idi helau 'oiuwa.
Copyright information for
BDD